Annar dagur Landsfundar bæjarstarfsmannafélaga fór fram í Vestmannaeyjum í dag, fimmtudaginn 17. september. Dagskrá dagsins einkenndist af fræðslu, umræðum og sameiginlegri vinnu um samstöðu, réttindabaráttu, sýnileika stéttarfélaga og stöðu kjaramála.
Samstaða og réttindabarátta
Sonja Ýr Þorbergsdóttir, formaður BSRB, hóf dagskrá dagsins með erindi um samstöðu, réttindabaráttu og hlutverk BSRB og stéttarfélagshreyfingarinnar.
Sonja fór yfir hvernig BSRB vinnur að hagsmunum aðildarfélaga sinna og félagsfólks, meðal annars með beinni hagsmunagæslu gagnvart stjórnvöldum og atvinnurekendum, þátttöku í opinberri stefnumótun og með því að styðja aðildarfélögin í kjarasamningsgerð og réttindabaráttu.
Í erindinu var meðal annars fjallað um þau fjölmörgu mál sem BSRB hefur haft aðkomu að á undanförnum árum, svo sem styttingu vinnuvikunnar, fæðingar- og foreldraorlof, húsnæðismál, virðismat kvennastarfa, almannaþjónustu, heilbrigðis- og menntamál og aðgerðir til að brúa bilið milli fæðingarorlofs og leikskóla.
BSRB var stofnað árið 1942 á þeim grunni að opinbert starfsfólk stæði sterkara saman en hvert félag fyrir sig. Sonja benti á að sú hugsun ætti enn fullt erindi í dag. Samstaða félaganna, sérþekking þeirra og sameiginlegt samnings- og hagsmunavald geri hreyfingunni kleift að hafa áhrif langt umfram það sem stærð hennar ein og sér gefur til kynna.
Í erindinu kom einnig fram að góð opinber þjónusta og góð starfskjör starfsfólks haldist í hendur. Ef samfélagið vill öfluga þjónustu við börn, eldra fólk, í skólum, heilbrigðisþjónustu og öðrum grunnstoðum samfélagsins þurfi jafnframt að standa vörð um kjör og starfsumhverfi þeirra sem sinna þjónustunni.
Sérstök áhersla var lögð á trúnaðarmannakerfið sem eitt mikilvægasta tengslanet stéttarfélaganna við vinnustaðina. Öflugt trúnaðarmannakerfi gerir félögunum kleift að fylgjast betur með stöðu mála á vinnustöðum, bregðast fyrr við þegar réttindi eru í húfi og skapa virkari tengsl við félagsfólk.
Í kjölfar erindisins tók við borðavinna þar sem þátttakendur ræddu meðal annars stöðu réttinda bæjarstarfsmanna, hvernig stéttarfélög geti brugðist við þegar að réttindum er sótt og með hvaða hætti hægt sé að styrkja stöðu félaganna til framtíðar.
Kynning á sameiginlegri auglýsingaherferð
Eftir hádegismat tók við kynning frá auglýsingastofunni Hér og Nú, sem hefur unnið að hugmyndum að sameiginlegri auglýsingaherferð bæjarstarfsmannafélaganna.
Markmið vinnunnar er meðal annars að auka sýnileika félaganna, ná betur til nýrra og núverandi félagsmanna og styrkja sameiginlega ímynd þeirra.
Fjallað var um mikilvægi vandaðra heimasíðna, aðgengilegra upplýsinga og markvissrar notkunar miðla til að ná til félagsfólks þar sem það er.
Staða kjaramála
Síðdegis var farið yfir stöðu kjaramála með framsögu Sonju Ýrar Þorbergsdóttur, formanns BSRB, og Jönu Eirar Víglundsdóttur, hagfræðings BSRB.
Jana Eir hóf umfjöllunina á stöðu efnahagsmála og forsendum gildandi kjarasamninga. Fram kom að forsenduákvæði samninganna væru nú brostin, en ársverðbólga í ágúst mældist 5,6%. Húsnæðisliðurinn hefur þar mikið vægi og hefur hækkað umfram vísitölu neysluverðs, auk þess sem fleiri innlendir kostnaðarliðir hafa hækkað.
Jana fjallaði einnig um að hagvöxtur hafi verið lítill það sem af er kjarasamningstímabilinu á sama tíma og atvinnuleysi hefur aukist, sérstaklega meðal ungs fólks og fólks af erlendum uppruna.
Einnig var fjallað um vinnu stýrihóps fulltrúa stjórnvalda, ASÍ og SA vegna verðlagsþróunar í tengslum við kjarasamninga og um þróun kaupmáttar ráðstöfunartekna. Meðal niðurstaðna þeirrar vinnu er þörf fyrir ítarlegri söfnun launaupplýsinga svo fáist skýrari mynd af þróun launa á vinnumarkaðnum.
Húsnæðismál voru þar fyrirferðarmikil. Sonja lagði áherslu á að hækkandi húsnæðis- og leigukostnaður vegi þungt í útgjöldum heimila og kallaði eftir auknu framboði á hagkvæmu leiguhúsnæði og óhagnaðardrifnum húsnæðislausnum. Einnig var rætt um mögulegar leiðir til að bregðast við miklum hækkunum á húsaleigu og reynslu annarra landa af takmörkunum á leiguhækkunum.
